華裔女歌手泳池自拍 背後出現怪人頭(圖/視頻)
發布時間1個月前
敬請注意: 新聞取自各大媒體,其內容觀點不代表本網立場!

22歲加拿大華裔女歌手呂雨澄(Melo Lv)日前喺泳池暢泳,更自拍影片叫粉絲一齊去玩,她邊拍邊移動鏡頭,點知後方突然出現一個古怪人頭,其後又突然消失。人頭雙眼深邃全黑無瞳孔,十足都市傳聞嘅Black-eyed kid(黑眼兒童)。

Melo Lv喺泳池邊live,叫粉絲join佢哋一齊玩。

呂雨澄係新晉華裔歌手,唔係好多香港人認識,但被譽為全能型創作歌手,粉絲遍布中國同北美,去年佢喺加拿大推出英文單曲,今年亦有首國語新歌《你不懂》,有個人facebook專頁同ig。日前佢同一女性朋友喺泳池嬉水,並用手機開live,用英語說自己身處溫哥華,正等待朋友但對方遲大到,然後移動手機拍攝四周環境,說:「這裡環境很好,有飲品又有兩位女士,你們見到應該盡快來加入我們。」

介紹完朋友之後,鏡頭一擺,就見到Melo身後出現古怪人頭。
究竟個人頭真係有古怪,抑或只係八卦嘅鄰居就不得而知。

但移動鏡頭時,Melo背後遠處突然出現一個人頭,鏡頭再擺動人頭就消失咗。人頭突然喺樹後出現,雙眼深黑非常恐怖。有網友就形容恐怖人頭好似都市傳聞中嘅Black-eyed kid(黑眼兒童),傳說呢種黑眼兒童經常出現喺美國,會突然走嚟狂敲屋門、敲窗甚至敲車門,叫人俾佢入屋,遇到佢哋會好似被催眠一樣,但畀佢入咗屋之後會點就冇人知,有傳聞話黑眼兒童係吸血鬼,有人話係撒旦化身或者外星人。

黑眼兒童嘅傳說大概有20年歷史,喺美國多處地方都有人聲稱遇過。

Melo睇到留言至知道拍到恐怖人頭,佢表示:「真的很恐怖,我當時並不知道這事,我相信有鬼魂,在中國長大很容易說到鬼魂,並且認為有些是真的!」不過亦有網友猜測只係鄰居八卦望一望,咁啱被鏡頭拍到啫。

呂雨澄來自福建,是在加拿大發展的華裔女歌手。
唔係好多香港人識佢,其實呂雨澄粉絲遍布內地同北美。

文章來源: 香港01|娛樂

屏蔽所有廣告一小時